ბოლო წლებში მზარდი აღიარება ჰპოვა STEM-მა (საბუნებისმეტყველო მეცნიერებები, ტექნოლოგია, ინჟინერია, მათემატიკა), როგორც საშუალებამ განათლების სფეროში მოამზადოს თანამედროვე ადამიანი, რომელსაც თანამედროვე გამოწვევების დაძლევა შეუძლია. სთიმითის ერთ-ერთი მიზანი არის STEM განათლების ხელმისაწვდომობის გაზრდა. რადგანაც რაიონულ ცენტრებს მოშორებულ სოფლებსა და დასახლებებში ამის პრობლემა ნამდვილად არის, სთიმითის გუნდმა განახორციელა პროექტი "STEM-ის ხელმისაწვდომობის გაზრდა რაიონულ ცენტრებს მოშორებულ სოფლებსა და დასახლებებში". პროექტი მიზნად ისახავდა მოსწავლეებისთვის და მასწავლებლებისთვის თანამედროვე ინტერდისციპლინური სწავლების მიდგომის გაცნობას, ტექნოლოგიებისა და ინჟინერიის ჩართულობით. პროექტის მონაწილეებს საშუალება ჰქონდათ გაცნობოდნენ ციფრული ტექნოლოგიების ერთ-ერთ წარმომადგენელს მიკროკონტროლერ Arduino-ს და მის სენსორებს. მათ შეისწავლეს თუ როგორ დაგეგმონ თემის საჭიროებაზე ორიენტირებული პროექტები, შექმნან შესაბამისი ავტომატიზირებული სისტემები და ეს ყველაფერი გააკეთონ სკოლის ბაზაზე საგაკვეთილო პროცესში.
პროექტის ფარგლებში კონკურსის წესით შეირჩა 12 რაიონულ ცენტრებს მოშორებული სკოლა საქართველოს მასშტაბით.
შერჩეულ სკოლებში გადამზადნენ მასწავლებლები და მათთან ერთად მოსწავლეებიც ჩაერთნენ STEM ვორქშოპში, რამაც გაზარდა მათში STEM ცნობიერება. ამასთანავე, თითოეული სკოლიდან პროექტში ჩართული მასწავლებლები და მოსწავლეები გაეცნენ პროგრამირების და ელექტრონიკის საწყისებს, შექმნეს მათი პირველი ავტომატიზირებული მოდელი. აღსანიშნავია, რომ მათ საჩუქრად გადაეცათ Arduino-ს სასწავლო ნაკრები თავსებადი სენსორებით და ელექტრონიკის მინილაბორატორია, რაც მათ აძლევთ საშუალებას გააგრძელონ მსგავს პროექტებზე მუშაობა და შექმნან თემის საჭიროებებზე მორგებული პროექტები, ასევე, მონაწილეობა მიიღონ STEAM კონკურსებსა და გამოფენებში.
